บ่าได้เข้ามาแว่เวียนแถวอาหารก๋านกิ๋นเมินนักแกครับ.... เหตุเพราะ หว่างนี้กิ๋นเข้าต๋ามฮ้านต่างๆ บ่าไค้ได้... เป๋นโรค อยู่ครับ โรคทรัพย์จ๋างครับ ต๋ามสมัยนิยมหน่อยนึ่ง.... กึ๊ดขึ้นได้ว่ามีฮ้านก๋วยเตี๊ยวแบบเศรษฐกิจพอเพียงเหมือนบ่าเดี่ยวอยู่เลยลองไปหน่อย.... ถ้าได้ไปตางเจ็ดยอด เข้ากองวัดเจ็ดยอดตี่จะไปผ๊ดคันคลองจะมีซอยหน้อยๆ แยก เข้าไปฮ้านนี้ครับ...

สุ๊ดกองตี่แยกมาจะเป๋นสามแยกฮ้านมีตั๊ดนี่พอดี... ตะก่อนเปิ่นก่อขายตั๋ดนี่ แต่ย้ายไปมาหลายตี่ อันนี้แล้วแต่ว่าเปิ่นจะหื้อเจ่าตี่จะใด แต่สุ๊ดท้ายต๋อนนี้มาซื้อตึกอยู่ตั๋ดนี้ละ... จื่อฮ้านข้าวซอยจันทร์สวย...

ป้ายฮ้านนี่สุ๊ดจะเก๋าเลยกำแล้ว.... อยู่มาแผวบ่าเดี่ยวก่อกึ๊ดเอาเต๊อะว่าฝีมือจะเป๋นจะใด... ถามเปิ่นปี่เปิ่นบอกว่าขายมาสามสิบปี๋แล้ววววว.... ป๊าดโท๊ะ ซ้ำคนยังบ่าเกิดเตื่อก่อมี.... อันอี่ลุงนี่จ๋ำอายุตั๋วเก่าก่อได้ตึ๊กสิบแปดต๊ะอ๊ะ.... ฮิ ฮิ...

ฮ้านนี้เป๋นตี่เปิ่งปิงขี้ปุ๋มของคนเทคโนตึงหมู่ตึงมวลมาเมิน อ้ายดิจิตอลแมนนี่ก่อไปเจื่ออยู่ก้า... เห็นหว่างก่อนเกยเอามาลงเตื่อละก่าหา... ผ่อก่าไก่ตุ๋นเปิ่นนี่ก่าาาาาา....

เปิ่นมีอาหารหลายอย่าง มีตึงข้าวซอย ก้วยเตี๋ยว มีตึง เข้าหมู่กรอบ หมูแดง.... อ่าาาาา... อันนี้กอยหมูกรอบไปพลางๆ ก่อน...

ส่วนหมูแดง กุนเชียง ก่อ เน๊าะ........ มันยั่วใจ๋แต้ๆ....

หมูกรอบงามๆ จะอี้ จะซื้อปิ๊กบ้านบ่าฮู้เปิ่นจะขายก่อ แต่แน่ๆ เขี้ยวมันบ่าค่อยจะสามัคคีกั๋นต๊ะใด..... เฮ้อ...

เวลากิ๋นหมูแดงหมูกรอบมันต้องกิ๋นกับอันนี้เลย แก้หวัดได้ดีโตย.... เสียอย่างเดียวกิ๋นละบ่าต้องได้ไปอู้กับไผละเน่อ... ฮ่า ฮ่า...

ส่วนถ้าว่ากิ๋นเข้าซอยมันต้องอันนี้นำเลย...

ละก่ออันนี้แอมขี้ข้างแก้เลี่ยนหน่อย.... ฮ้านนี้บ่ามีกำว่าจิ๊... ถ้ากิ๋นบ่าปอ ขอแหมได้....

กอยรายก๋านอาหารเปิ่นก่อนน่อ...

ส่วนราคาก่อมิตรภาพดีแต้ๆ เฮาว่าเป๋นราคาสมเหตุสมผล.... กับปริมาณตี่ได้ฮับ...

น้ำเปิ่นก่อมีหื้อกิ๋นฟรี แต่ต้องบริก๋านตั๋วเก่าหน่อย เพราะว่าเปิ่นมีกั๋นสองตายาย....

เครื่องปรุงต่างๆ ก่อสะอาดปอใจ้ได้... ครับ....

เอาละครับตี่สั่งไปมาแย้ววววว.... เริ่มจากเข้าซอยเนื้อครับ... เนื่อบ่าเหนืยว บ่ามีมัน...

ติ๊ดต๋ามด้วย... ข้าวซอยน่องไก่คร๊าบบบบบ....

ก่อจะไปดีลืม เครื่องแนมเน่อครับ.... แต้ๆ เปิ่นมาเสริฟก่อนแล้วอันนี้...

ละก่อนี่ครับ ก๊วยเตี๊ยวเนื้อรวมครับ.... อ่าาาาาา...

กิ๋นก๋วยเตี๊ยว จะหื้อลำต้องมีผักโตยเน๊าะ.... มีผักหลายอย่าง... ผักส๊ดๆ ไปตักเอาเองก่าได้ครับ...

ยังบ่าหนำใจ๋ เอานี่โตยไป หมูแดงหมูกรอบคร๊าบบบบบ.... น้ำข้นๆ กิ๋นกับ ต้นหอม... ยอดเลยครับ...

เปิ่นหื้อมาพร้อมน้ำซุปหื้อพอคล่องคอขึ้น แต่ถ้าไผซอบแบบแซบๆๆๆๆๆๆ ก่อนี้โตยไปเลยครับ.... พริกน้ำป๋า....

ลำบ่าลำจะไปถามแต่เฮาไปกิ๋นแล้วสภาพมันเป๋นจะนี้....

น้องเจี๊ยบอ๊ดบ่าได้ต้องจะนี้ๆ ครับ ไผจะว่าลำบ่าลำบ่าเกี่ยว.... เฮาเปิงใจ๋ของเฮา.... ฮ่า....
คลิ๊กเพื่อดูไฟล์แนบ
เหอ เหอ วันนี้กั๊ดต้องไปแหมคาบ... ลืมแป๋งแผนที่ไป แล้วถ้าแป๋งเสร็จจะเอามาหื้อแหมกำเน่อ... วันนี้ต๊ะอี้ก่อน... กั๊ด... อ่าาาาา...คลิ๊กเพื่อดูไฟล์แนบ

ร้านนี้ กิ๋นมาตั้งแต่ เป๋นนักเรียน จ๋นบะเด๋ว ก็ยังไปอยู่ครับ รำดีครับ ละก่อถูกโตย ตึงหมูกรอบ เนื้อเปื่อย สองอันนี้ นี้เหมาะขนาดครับ

อ้ายเจี๊ยบ เล่นยกนิ้ว หื้อจะอี้ ลุงตรีรับประกั๋น อ้ายดิจิตอลก่อยืนยัน นอนยัน ว่าลำแต้ จะอี้ก่อต้องหาเรื่องไปจิมพ่องละ....

อยากกิ๋นข้าวซอยสักถ้วยจ้าว....น้ำหนัวๆ ท่าจะลำแต๊เน้อ....

ไปจิมมาละครับ เมื่อวันก่อนลุงตรี กับอ้ายเจี๊ยบ กับน้องมิ้ม ปาไปกิน เลยสั่งหมูกรอบมาลองจิม ลำดีอย่างตี่ลุงตรี อ้ายเจี๊ยบ อ้ายดิจิตอลรับประกัน......ป๋ายแห๋มปอหันลุงตรีสั่งข้าวซอย ก่อเลยต้องสั่งมาจิมซักถ้วย ปรากฎว่า หมดตึงสองอย่าง...กั๊ดต๊องไปเลยเน้อ จาวหมู่......กั๊ดต๊องครับ....ขอบคุณลุงตรีตี่เป๋นเจ้าภาพโตยครับบบบบบบ

ป้าสวยเปิ้นใจ๋ดีครับ แต่ว่าบ่เด๋วน่าฮ้อน ฮ้านจะอวมๆๆหน่อยเด้อ ไปก่อนเตี่ยงน่าจะดีครับ

อยู่ใกล้บ้านเลย

กินมาตั้งแต่เด็ก

อิอิ

ร้านนี้แหละครับ เปิ้นย้ายที่บ่อยมากๆ ผมเป๋นลูกค้าขาประจำเปิ้นตั้งแต่สมัยเฮียนเทคโนฯตี๋นดอย

ผมไปเซาะหาร้านที่เปิดใหม่เปิ้นบะเจอ จะใดช่วยบอกเส้นทางร้านแหมกำเน่อครับ ลุงตรีครับ