หันเปิ้นโพสฮูบอาหาร.....แนะนำกับข้าวลำๆ......ดูฮูบไปตวย อ่านไปตวย
ลึนน้ำลายลืดๆ ไปตวย

ทำหื้อรำลึกถึงความหลัง....ขอฮ่วมรำลึกกับเพื่อนหมู่ตี้มีอายุ 40 อัพ....ว่า "กึ้ดเติงหาเน๊าะ"

1) ร้านก๋วยเตี๋ยวจันทร์สวย "ก๋วยเตี๋ยวไก่ตุ๋น" ที่เคยอยู่ตางกาดหลวง.....
ขายแปงตวยนาสมัยนั้นก๋วยเตี๋ยวฮ้านอื่นเปิ้นขาย 5 บาท 10 บาท จันทร์สวยบ่อสน....20 - 25 -30 ขึ้นราคาเรื่อยๆ....ของเปิ้นลำขอบอกมีคนกิ๋นเต็มฮ้าน....ไอติมกะทิของเปิ้นลำแต้ๆ....กึ้ดเติงหาเจ๊เจ้าของฮ้าน....

2) "ร้านไอติมกะทิศรีพิงค์" ขายอยู่หน้าโฮงหนังศรีนครพิงค์ ก่อนดูหนัง หลังดูหนัง
ต้องแวะกิ๋นไอติมก่อน เปิ้นขยายร้านไปเปิดที่ข้างๆ โฮงหนังศรีวิศาล.....ลำแต้ๆ นา......บ่าเดี่ยวหาร้านที่เปิดขายเฉพาะไอติมกะทิใส่สารพัดหน้าบ่าใค่มีแล้ว

3) "ตือคาโค เต้าหู้ทอดศรีพิงค์" ขายตี้หน้าโฮงหนังศรีพิงค์ สุดยอดของความลำ โดยเฉพาะน้ำจิ้มคะแนนเต็ม 100

4) "ร้านไอศครีมสวีทรูม" หลังโฮงเฮียนยุพราช ติดกับตลาดบุญอยู่ ตำนานแห่งไอติมรสชาดต่างๆ ฮู้จักไอศครีมซันเดย์ บานาน่าสปริท ครั้งแรกกั๋นก่อที่นี้แหล่ะ

5) "ซุ้มโฟโมส - ศาลาโฟโมส" ที่ไนท์บาซ่าร์....อันนี้สุดยอด เป็นเจ้าแรกที่นำการบริการแบบช่วยตั๋วเก่ามาเจ้าแรกในเจียงใหม่มีแต่คนขายอยู่ที่เคาน์เตอร์ คนซื้อต้องไปสั่งและนำไอติมมากิ๋นคนเดียว......แรกๆ คนซื้อปากั๋นงงๆ ว่าเห้อ...พนักงานหยังบ่ามาถามว่าจะเอาอะหยัง.....และเขาหยังบ่ามาเสริฟหื้อ.....ถ้วยจ้อนไอติมเป๋นพลาสติคสีส้ม กิ๋นแล้วทิ้งได้เลย ฮ้านที่ว่านี้...มีเวยไปหน่อย...บ่าสามารถเปลี่ยนนิสัยคนที่ชอบหื้อบริการได้.....เลยต้องปิดตั๋วไป

6) "กล้วยปิ้งหน้าโฮงหนังสุริยา" ค่าดูหนังเริ่มที่ 5 บาท/ที่นั่ง ปาดโท๊ะกล้วยปิ้งเจ้านี้บังอาจขายแก่นละบาท (สมัย 20 ปี๋นั่นเน้อ) กึ้ดดูเล๊าะ......แต่รับประกันความลำ เพราะกล้วยของเปิ้นมันตุ้ยปุ๊กลุ๊กทุกแก่น โดยเฉพาะน้ำกะทิที่ราดกล้วยหนีบ......สุดยอด

ฮ้านที่ว่ามาทั้งหมดข้างบน บ่าเดี่ยวบ่ามีแล้ว (ผ่านมาเกือบ 20 - 30 ปี) บรรยากาศ อรรถรส วิถีชีวิต รสนิยมของคนเฮามันเปลี่ยนไปตามเวลา ตามยุค ตามสมัย.......เลือกบริโภคกั๋นตามสบาย ตามกำลังทรัพย์ของแต่ละคน ก่อแล้วกั๋นน้อ.......

อยากถามบ่าเดี่ยว ฮ้านอาหารที่อยู่คู่กับคนเจียงใหม่มาเป๋นเวลายาวนานตั้งแต่เฮาเป็นล่ะอ่อน....
มีฮ้านอะหยังพ่องน้อ....ที่เห็นๆ คือ "ร้านแซนวิชบาร์" ที่อยู่ตรงแจ่งศรีภูมิด้านในล่ะ 1 ร้าน

เข้ามาน้ำลายไหล กับ รายชื่ออาหารเจ้า...

ไอติมกะทิ.. เห็นมีเจ้าหนึ่งตี้กองเหล่าโจ้วหน้าฮ้านขายผ้า.. ของเปิ้นก่อลำดีนาเจ้า...

ตือคาโค กับ เ้ต้าหู้ทอด.. ตะก่อนจะกิ๋นตี้หน้าโฮงเฮียนปรินส์ เจ้า.. บ่ะเดี่ยวนี้ยังมีอยู่ก่อหา.. อู้แล้วก่อเป๋นดีใค่อยาก...

น้าอินท่าจะฮู้จักก๋วยเตี๋ยวอาแป๊ะ ในกองเหล่าโจว์อยู่ก้าเจ้า.. ตี้ป่ะเดี่ยวเปิ้นย้ายไปขายในซอยเข้าไปตางในแห๋มน่อย ติดกับฮ้านขายผ้า... เพราะแม่ข้าเจ้าเป๋นแฟนประจ๋ำมาตั้ืงแต่เป๋นนักเฮียนละเจ้า... ของเปิ้นก่อยังลำเหมือนเดิม ข้าเจ้ามักเย็นตาโฟเปิ้นเจ้า ลำดี...

อู้เรื่องของกิ๋นของว่า... ตี้ไหน ก่อสู้เมืองไทยเฮาบ่ะได้เจ้า.. เพราะมีของกิ๋นหื้อได้ใส่อิ่มต้อง ตลอด 24 ชั่วโมง..

ไผไปกิ๋นอะหยัง. ก่อกิ๋นเผื่อกั๋นตวยเน่อเจ้า...

ตือคาโคกับเต้าหู้ทอดหน้าปริ้นส์......ยังมีอยู่เจ้า......คิวยาววววววววววขนาดดดดดด
มีวันคืนหนึ่งน้าอินไปซื้อ....โชคดีแต้....บ่ามีคนยืนหน้าร้านเลย ก่อว่าวันนี้หยังบ่ามีคน กำเดียวบ่าดาย
มีคนมาต่อน้าอินเกือบสิบกว่าคน เป๋นอันว่าวันนั้นได้กิ๋นสมใจ๋อยาก
เพราะตามปกติถ้าเห็นคิวยาวๆ ใจ๋มันฮิ้น บ่ากิ๋นก่อได้

ก๋วยเตี๋ยวอาแป๊ะกองเหล่าโจ้ว.....ใจ่เลย.....แต่บ่าล่ำได้ไปกิ๋นเพราะ หาตี้จอดรถยาก

แต่ฮ้านไอติมตี้น้องว่า.....ยังบ่าเกยไปกิ๋นเจ้า....
เปิ้นว่ากั๋นว่าผู้สูงอายุ (คนเฒ่าน่าก่า) ชอบกินไอติมกะทิ
ละอ่อนจะชอบกิ๋นไอติมสตอเบอรี่ หมู่วัยรุ่นจะชอบกิ๋นไอติมช๊อคโกแลต
หว่างนี้น้าอินไค่อยากแต่ไอติมกะทิ บ่ะลั้งถ้าจะเข้าสู่วัยชราซะแล้วก่าตัวเฮา

เปิ้นเล่าว่า ตือคาโคศรีพิงค์ บ่าเด่วอยู่ตี้ กองข้างสหพานิชย์ ลองไปผ่อลอแม่นก่อ ผมไปมาแล้วเปิ้นขายเมื่อแลงเน่อ

เป๋นละอ่อนตี่บ่าได้เข้ามาแอ่วในเวียงเต่าใดครับ ช่วงนั้น ก่อเลยบ่าด้เข้าไปใจ๊บริการซักฮ้าน......แต่ก่อก๋ายไปก๋ายมาฮั่นเนาะ.ครับ

เอิ๊ก....................อ่านอย่างเด๋ว อิอิ



ตือคาโค กับ เ้ต้าหู้ทอด..



กึ๊ดเติง หา โองหนัง ศรีวิศาล ตี้ น่ากั๋วเหมือน ....บ้านผีสิง อิอิ

ตี่ตันๆก่อกล้วยปิ้งหน้าโฮงหนังสุริยา จำได้เลาๆว่าไปผ่อหนังกับอี่ป่อละซื้อปิกบ้าน ส่วนตือฯหน้าปริ้น
ก่อตอนไปสอบเมื่อน้อยๆ ลำดีคับนอกนั้นบ่อได้ก๋ายไก้เป๋นละอ่อนชานเมืองคับ(ชาวแม่ริม)

นึกได้แหม......ตำนานร้านอาหารเก่าแก่ของเจียงใหม่
( ที่ยังเปิดขายอยู่ และเปิดมาแล้วบ่าต่ำกว่า 20 ปี๋ )

ร้านอรุณ (ไร) อาหารไทย-อาหารเมือง แถวประตูท่าแพ เกยใจ้เป็นสถานที่ถ่ายทำหนังฮอลีวู๊ดมาแล้วตวย

ร้านช้างม่อยกาแฟ ก๋วยเตี๋ยวรสชาติเมืองแต้ๆ อยู่แถวข้างๆ โฮงเฮียนยุพราชฯ
( เปิ้นว่า....น้ำก๋วยเตี๋ยวเมือง จะใส่ข่าสดตวย กลิ่นจะเป็นกลิ่นพิเศษ )

สมัยเป๋นละอ่อน ฮ้องเพลงแซวเปิ้นว่า "เจ็บใจ คนรักโดนรัง ข้าจะเผาจ้างม่อยกาแฟ
ให้มันวอดวาย" โฮ๊ะ! มันเกี่ยวอะหยังกั๋นนี่.....

ร้านเกษมสโตร์ ขายขนมปัง กับอุปกรณ์ทำขนม (ฮ้านของเจ๊กี) ร้านดั้งเดิมอยู่ตี้ถนนราชวงศ์

ต๋อนเป๋นวัยรุ่น ไปซื้อของฮ้านเจ๊กี......เจ๊ถามว่า อื่หน้อยจะไปไหนกั๋นเนี่ยะ.....
จะไปนอนบนดอยเจ้า......เอ่อ! ซื้อขนมไปนักๆ จะอี้เวลาปิ๊กลงมาเอาขี้เยี่ย (ขยะ)
ที่ใจ้แล้วของเฮา ลงมาตวยเน้อ......เสน่ห์เจ๊กี ปากฮ้ายแต่ใจดี

เกยกิ๋นไอติมโฟร์โมสต์ต๋อนหล่ะอ่อน ลำแต้ ๆ เจ้า

ข้าเจ้า เป็นละอ่อน.. บ้านนอก..เวียงเจ้า แต่ก็ตันได้กิ๋นไอติมกะทิโฮงหนังศรีพิงค์เจ้า กึดเติงหาโฮงหนังศรีพิงค์และก่อ
โฮงหนังศรีวิศาลเจ้า ต่ะก่อนเป็นละอ่อน อาชีวะ ต้องไปกิ๋นก๊วยเตี๋ยว 3 บาท ข้างยุพราชและ หลังปริ้นท์เจ้า ถ้าวันไดมีสะตังค์นักหน่อย ก็ได้กิ๋นก๊วยเตี๋ยวร้านช้างม่อยกาแฟ ลำแต้ ๆ

แต่ก็ตันได้กิ๋นไอติมกะทิโฮงหนังศรีพิงค์เจ้า ต้องกินคู่กับ
กล้วยปิ้งที่แม่ค้ามาปิ้งขาย ติดๆกับร้านไอติม สี่แก่นบาท
อร่อยถูกลิ้นไทยๆดี

แฮะ แฮะ บ่ตันซักอย่างเลยจ้าว ข้าจ้าวเป๋นละอ่อนป๋าย ๆ อยู่จ้าว

บ่ได้อยู่ในเวียง กิ๋นก๊ะข้าวเงี้ยวตี้เปิ้นหาบมาขาย เงี่ยว เงียว เงียว เงี๊ยววว...

รู่นผม ไปกิ๋นร้านโบ๊ต ห้วยแก้ว ปั่นรถถีบไป (เกยหันอี่ลุงตี้หาบไม้กานขายข้าวเงี้ยวกั๋นก่อ แกเตียวรอบเวียง บ่เดี่ยวบ่ะหันล๊ะ อ้ายตี้ขายตะโก้ฮูปมิกกี้เมาท์แห๋มคน หันตั้งแต่หละอ่อนล๊ะ)

ยังบะถึงสี่สิบเจ้า แต่บางตี้ก่อฮุ้จักเจ้า ศาลาไอติม เกยไป ยังจ๋ำบรรยากาศได้เจ้า โฮงหนังศีวิศาลนี่น่ากลั๋วแต๊ะเจ้า ที่กึ๊ดเติงหาแหมตี้คือ ห้างตันตราภัณฑ์ อะเจ้า ตะก่อนนี่ถือว่าน่าแอ่วขนาด รถราบะใจ่ห่นักจะอี้ ไปไหนขึ้นรถเมลล์ไป... ทำฮื้อนึกถึงบรรยากาศเชียงใหม่สมัยเก่าได้ดี มาวันนี้เปลี่ยนไปนัก.....ขนาด....จ๋นทำฮือหู้สึกใจ๋หาย บอกบะถูก กึ๊ดเติงหาเมืองเก่า

ละบะกึดเติงหาโฮงหนังชินทัศณีย์กา โฮงหนังเวียงพิงค์ลอ ละแหมอย่างน้ำแข็งตี๋นสะพานเนาวรัฐตี่ไฟเขียวไฟแดง มาตางสันป่าข่อยอยู่ตางขวามือ

อู้ถึงศรีนครพิงค์ ก่อนจะเข้าโฮงหนังจะไปลืมส้มดองเจ๊กไก่หน้าโฮงติ้วเข้าไปกิ๋นระหว่างรอหนังฉาย เมาะขนาด ก๋วยจั๊บแหน้าวัดแขก แยกราชวงค์ กับข้าวซอยฮ่อติดร้านตัดผมบรรจงเกษาใกล้แยกธานินทร์ เหน็ดขนาดไปหล่ายน้ำแม่ข่ากองหลังโฮงแรมปริ้นส์ (ซอยข้างลาสเวกัสปัจจุบัน) แคบไขทอดฮ้อนๆล้ำลำ ขึ้นมาตังสันคือ(ย่านต้นโพธิ์) ปะฮ้านข้าวซอยลุงตา แถวหนองล่มอันนี้ก่อจ๊าดลำ โจ้กดีปะเจ๊กอึ้งยู้ล้อก๋วยเตี๋ยวมาต๋ามถนน จอดก่อนถ้วย 3 บาทบ่ดาย เสียดายปิ๊กไปเฝ้าฮ่องเต้ ลูกหลานบ่ได้เจื้อซักคน พดมาปาตู๋เจียงใหม่เก้าต้นไม้ยางหล่ายกาด แปะเฒ่าสองคนกับป้า ล้อน้ำแข็งไสใส่ซะป๊ะแถมน้ำกระทิราดห้อมหอมถ้วย 2 บาทต๊ะอ๊ะ อันนี้เลิกเอียนจากโฮงเฮียนสิริเตียวอ้อมบ้านอ้อมเมืองมากิ๋นกู่แลง กึ๊ดเติงหาอดีตปุ้โท๊ะ ย้อนได้กาว่าต๋ายไปแล้วย้อนหลังได้ก่อเอาอยู่ ลุงคำปัน จ๊างม่อย ๒๔๙๓

รำลึกกึ๊ดเติงหาอดีตเจียงใหม่ ม้วนม่วนแต๊ๆ ไผตันหันสนามเด็กเล่นหอนาฬิก๋าหน้าโฮงหนังสุริวงค์ก่อเจ้า ตังในคือก่อบึ้ดบึดก่าฮ้านขนมหวานอ้ายรวนปี่พิน ข้าวมันตัดอะหยังมาลำไบ้ลำบอดกิ๋นจนตุ้ยมาถึงทุกวันนี้ คนขายสองคนผัวเมียท่าจะไปเปิดเฟรนด์ชายด์ตังต่างโลกละ ตังหน้าโฮงหนังที่เก้าไม้น้ำบ๊วย น้ำผักหนอก เซาะหาสมัยนี้ตี้ไหนก่อตึงเยี๊ยะได้ไชบ่เมิ๋นเปิ้ล ขึ้นมาตังแยกน้ำพุสมเพชร หัวมุมถนนจ้างม่อย ฮ้าน****ซ้งผัดลาดหน้าห่อใบต๋อง มันลำห้อมหอม เอาโอเลี้ยงใส่กะป๋องนมหิ้วเชื้อกกล้วยกระป๋องบาทเดียวบ่ดาย แถวหน้ากาดสมเพชรสมัยก่อนมืดตึ้ดตื๋อ มีฮ้านตัดผมขายลาบขายซ่าก๊วยกับกาดอยู่ฮิมน้ำคือ บ่ไจ้เหมือนบ่าเดี่ยว หล่ายคือหลังวัดจุมปู (ที่ตั้งร้าน7 ปัจจุบัน)บ้านป้าสมเมื่อเจ้าจะหอมคื่นไส้อั่ว จิ้นปิ้งทอด อันนี้ก็เหน็ดสะหนาด ขวายมาเปิ้ลเอาข้ามมาขายกาดสมเพชรฮิมน้ำคือ มันกิ๋นดีล้ำสมัยก่อน ซะตังบาทสองบาทกออิ่มต้อง บ่าเดี่ยวตังร้อยก๊วยเตี๋ยวถ้วยทอนมาปอจะเกิ่งแบ๊งค์

ปาดโซ๊ะ!!!! ขอคารวะท่าน "ดอยคำ".......ที่ท่านเล่าอู้มานั้น ข้าเจ้าถ้าจะยังละอ่อนหน้อยขนาดเลยเจ้า......

อันตี้ฮู้ คือ "โฮงหนังชินทัศนีย์" นอกนั้นบ่าฮู้จัก........ข้าเจ้าว่าท่าน "ดอยคำ" ถ้าจะ 60 อัพเป๋นแน่แท้

คาราวะท่านดอยคำท่านเก่าแต๋ๆ ทำฮื่อผมนึกถึงหอนาฬิก๋าหน้าโฮงหนังสุริวง ต๋อนผมอายุซักซาวเอ็ดซาวสองก๋ายหน้าปะตู่ต้าแปกั๋วกะเทยขะนาด

ผมก็ซอบไปผ่อหนังที่ โฮงหนังศรีวิศาล ยอดเยี่ยมกระเทียมดอง เสียดายบ่อมีแล้ว เป็นหนังฆ่าฟันกันเกือบทั้งเรื่องมันส์มาก นึกแล้วเสียว อะจี๋ย

ก๋วยเตี๋ยวป้าในหลังโฮงเฮียนปริ๊นฯ ข้าวซอยอิสลามข้างปริ๊นฯ ข้าวซอยแม่ลำดวน ร้านกับข้าวสวนดอก ข้างคอกใหม่ ร้านกาแลหลังมอฯ ร้านโบ๊ตหน้มมอ.ข้าวมันไก่ ไอติมกะทิสด ข้างศาลากลางเก่า ก็เกือบๆ 40 ปีแล้วล่ะ

ไค่อยากกิ๋นบ่าก้วยดอง อยู่ตี้สี่แยกสวนดอก ก่อนถึงครัวขุนแผน บ่เดี่ยวเปิ้นบ่ขายละ เสียดายขนาด
มักโรนี ร้านตูบน้อยเปิ้นยังมีอยู่ก่อเจ๊า ข้าเจ้ามาอยู่กรุงเทพฯ เมินๆ ปิกบ้านเตื้อ เสาะหาคัวกิ๋นเก่าๆ เปิ้นก็บ่ขายไปเหีย

ต้องอู้ต๋ามซื่อว่า.. บางที่บ่าเกยหันเจ้า.. แต่ที่จำแต้ ๆ ก่อ..ศาลาโฟรโมสต์อ่ะเจ้า.. แหล่งรวมของละอ่อนดาราเจ้า.. วันหยุดก่อต้องร้านโบดเจ้า.. แอ่วห้างก่อต้องตันตราภัณฑ์กับสีสวนเจ้า.... อิอิ

ยังหมะถึง 40 แต่กอะเกยกิ๋นกุอย่าง ยกเว้นขอ 6 ข้อเดียว โฮงหนังสุริยาอยู่ตัดใดฮั้นคับ

อยู่หลังโรงหนังสุริวงค์นะครับ ซอยเล็กๆ
(โรงหนังสุริวงค์ อยู่ตรงข้างข่วงประตูท่าแพ)

บ่มีไผกึ๊ดเติงหาโฮงหนังสุริยงพ่องกาครับ ตะก่อนชอบไปขะหนาด หนังบ่เต้าใด แต่ชอบไปซื้อขนมกับของเล่นบะหลิกจิกจอกตี้ฮ้านหนูยิ้ม บ่าเดี่ยวนี้ฮ้านเปิ้นย้ายมาอยู่ข้างไปรษณีย์พระสิงห์เหียละ ใหญ่มาแหมน่อยก่อชอบไปเซาะผ่อเทปเพลงตี้ฮ้านตามหมู่นั้นน่ะ (สุมาตวยครับ จ๋ำจื้อฮ้านบ่ได้) พอเจ้าวงศ์เปิ้นขายตี้ไปก่อเลยก๋ายเป็นโรงแรมดวงตะวันอย่างวันนี้ ว่าถึงต๋ามหมู่นั้น ฮ้านข้าวซอยจ้างฆ้องก่อเหน็ดขหนาดเน้อครับ อี่ป้อปาไปกิ๋นหมั่นขนาด เสียดายบ่มีคนสืบทอด อู้ถึงฮ้านหนูยิ้มแล้วเลยนึกได้ ตะก่อนไผเกยไปฮ้านเชียงใหม่เมืองเด็กพ่องครับ (ตี้อยู่เลยแยกธานินท์มาตางกาดเมืองใหม่) ต๋อนหน้อยๆ ผมไปดิ้นควะดิ้นควาดอยู่ในฮ้านเปิ้นมาแล้ว บะใจ้อะหยังครับ ของเล่นมันนักแต๊นักว่า อันใดก่อไข้ได้ อี่ป้อบ่ยอมซื้อหื้อก่อเลยงัดไม้ต๋ายมาสู้ ผลสรุปคือได้ของเล่นเหียอย่างพร้อมฮอยบิดมืดแหม 1 ฮอย (ฮู้จักก่อครับ มันเจ็บเหลือหยิกก่อน) แหะๆ มาเล่าสู่หื้อฟังบ่ดายเน้อครับ ปล.ผมยังบ่แผว 40 เตื้อเน้อ มอกซวาดไปซวาดมาต๋ามเลข 4 บ่ดาย

ใค่อยากส้มดองฮ้านนี้เหมือนกั๋นครับ

กึ๊ดเติงหาศาลาโฟร์โมสต์ตี้สุดเลยครับ อยากปิ๊กไปต๋อนเป๋นหละอ่อน