ถึงเวลาต้องจากชุมพร เฮาปากั๋นสูดเอาอากาศชายทะเลยามเจ้าๆ เข้าเต๋มปอดก่อนขึ้นรถ.... จะใดก่อบ่าลืมตี่จะบอกลาน้องปูเปิ่นเหียหน่อยเน๊าะ....

ตลอดตางย้อนปิ๊กมาเฮาก่อออกจากประตู๋บ้านเมืองใต้.... ผ่านเขาวังตี่สวยงามแล้วก่อ..... หลับ.... ต๋ามหละเบียบนั้นเน๊าะ เจ้าหมู่เหย ฉี่... ชอ๊ป ..... หลับ..... มาฮู้คิงแหมกำต๋อนลุ้นเข้าไปตี่ดอนหอยหลอด... เพราะเฮาขี่รถเลยไปหน่อย.... บ่าเป๋นหยัง เลี้ยวปิ๊กมาได้..... แล้วก่อมาแผวจ๋นได้.... ปาดโท๊ะ ดอนหอยหลอด คนหลวงคนหลาย... เฮาละจ๋ามเป๋นขี้มูกน้ำลาย เพราะเฮาแพ้ฝุ่น.... เอาละ เอาป๋าเก็มมาฝากเจ้าหมู่ก่อน...

ดอนหอยหลอดนี่เป๋นแหล่งรวมของกิ๋นกำแล้ว.... พอลงรถ... ชมรมแม่บ้านซีเอ็มร้อยแปดก่อหายแซ๊ป ไปตางใดก่อบ่าฮู้.... เอาเต๊อะ... เอาของฝากหื้อเจ้าหมู่ก่อน เริ่มจาก ป๋าหมึกปิ้ง..... ตั๋วหลวงๆ ปิ้งหอมๆ น้ำจิ้มแซปๆ..... เอ๊า เลือกเอากั๋นคนเดียวเน่อ.... น้องเอ้ย... เลือกเอา....

อะหยังเก๊าะ .... ไค้ได้ป๋าทูเก็มอี้กา.... เอาไปเลยเป๋นแหลบ.....

หา... บ่าก้อนจะเอาป๋ากุเลาเก็มจะอี้กา..... เอาไปเลยนึ่งถาดเต๋มๆ..... เก็มปอละยัง..... ฮ่า...

หยังเก๊าะ.... น้องแมวไค้ได้ปู๋ไปกิ๋นกับน้ำขาว.... ละก่อหมาใจ๋ดำ..... เอาไปเลยน้อง.... กะลังฮ้อนๆ.....

แหมเมาะๆ อ้ายเวปไค้อยากกั๊ง..... เอาแบบทอดกรอบๆ น่ออ้าย... กิ๋นแบบแจ่น้ำป๋ามันไค้น่ากั๋วไปหน่อย....

ป้ามี้กับน้องตู่ไค้อยากกุ้งทอดจะอั้นกา..... เอาไปเล้ยยยยยย...... หลายๆ ถาดก่อได้เน่อ....

อาจ๋านลุงไค้ได้น้ำต๋านปึ๊ก เอาไว้แป๋งน้ำพริกกาครับ.... เอามาเผื่อละเน่อ.... หอมหวานแต้ๆ...

ส่วนเจ้าหมู่ตี่เหลือก่อปากั๋นล้อมวงเข้ามาเลย.... มาจ่วยกั๋นแป๋งเขี้ยวอ่อนกั๋นหน่อยบ๋อ....

ห๋า.... ไค้ได้น้ำจิ้มแบบแซบๆ..... เอ๊า.... จัดให้... งานนี้จัดให้....

แต่ถ้ามักแบบคาวๆ หน่อยแบบนี้ก่อมีเน่อ.... เอาไปยำแหมหน่อยนา ใส่หอมใส่พริก... ป๊าดโท๊ะ.... ลุงรัตน์บอกว่ามักขนาดอี้นา....

นอกจากแบบดองนี่แบบนี้ยังแควน หอยจี่ ตางในเปิ่นเอามาปรุงก่อน ใส่เนยลงไปหน่อย.... อว๊ายยยย.... ลุงแดงถ่ายไปน้ำลายปุ๊ไป....

ส่วนไผตี่ชอบน้ำพริกป๋าทู.... นี่ของแต้เมืองสมุทรสงคราม มันต้องป๋าทูหน้างอแบบนี้....

คนมีอายุอานามตี่ต้องก๋านแคลเซี่ยม ก่อปากั๋นเกี้ยวปู๋กะตอยแบบนี้เล่นก่อได้เน่อ หวานมัน เผ็ดหน่อยๆ...