จากชะอำ... เฮาก่อย้อนปิ๊กมาเพชรบุรีแหมกำ... เพราะหนตางของคนซ้ำเตื่อเฮาอาจจะผ่านสิ่งดีๆ ในจีวิตไป.... แต่บ่าเป๋นหยัง ทุกสิ่งบ่าสายเกินก๋านฮู้จักปิ๊กไปเซาะหาสิ่งดีๆ ตี่ผ่านมา..... ขะแนมเฮาฮู้ก่าของมัน..... กึ๊ดจะนั้น...

เพชรบุรีต้อนฮับจุมเฮาด้วยกับเข้ายามเจ้าๆ ต๋ามแบบคนเพชร..... ลำบ่าลำอันนี้บ่าฮู้.... แต่ฮู้แน่ๆ คนตี่นี่ใจ๋ดีแต้ อู้ม่วนจ๋าหวาน....

เฮากิ๋นเข้าแล้วก่อปากั๋นไปวัดพระศรีมหาธาตุ..... เซาะตี่จอดรถบ่าได้ เลยไปตางหลังวัด มีวัดแหมวัดนึ่งจอดรถกว้างขวาง... แต่ต้องเตียวมาน่อย.... แต้ๆ แล้วเฮาถึงได้ฮู้ว่าคนเมืองเพชรนั้นเปิ่นมีน้ำใจ๋แต้ จ่วยบอกตางหื้อจ๊าดดี....

มันเยี๊ยะหื้อเฮาฮู้ เฮาเห็นว่า สิ่งตี่งดงามตี่สุ๊ดของคน ก่อคือ ความมีน้ำใจ๋ ความมีอัธยาศัยตี่ดี..... โอ... สิ่งนี้มันงดงาม งดงามแต้ๆ บ่าแป้วัดวาของเปิ่นเลย....

ในวัดมหาธาตุมีพระงดงามและสง่าแต้ๆ อยู่สามองค์ เป๋นจื่อหยังพ่อง... อันนี้ก่อจ๋ำบ่าได้ ฮิ ฮิ เมาก่าถ่ายฮูป แต่แน่ๆ มีองค์นึ่งละตี่จื่อหลวงพ่อเพชร... แต่บ่าฮู้องค์ไหนน่อ.... องค์ไหนก่อเหมือนกั๋นนั้นเน๊าะ.... เพราะพระดีอยู่ตี่ใจ๋คนกราบไหว้..... เฮากึ๊ดจะนั้น...

เฮากึ๊ดว่า พระจะงดงาม และศักดิ์สิทธิ์ ขึ้นอยู่กับผู้คนตี่มากราบไหว้ หากคนไหว้พระ จิตใจ๋ไหม้ดำ มันจะดีได้อย่างใด.... แต่ยามตี่คนกราบไหว้พระมีจิตใจ๋งดงาม เปี่ยมด้วยศรัทธา และความตั้งมั่นในความดีงาม แฮงแห่งความดีจะพอกพูน.... หื้อตึงผู้กราบไหว้ และสังคมรอบข้าง....

สังคมฮ่มเย็น.... ผู้คนงดงาม มันก่อทำหื้อ เกิดความแข็งแรง แข็งแกร่งของจิต ของใจ๋ ความสวยงามและฮ่มเย็นย่อมเกิดขึ้น.... อย่างตี่เฮาได้พบป๊ะ...

พระตี่เรียงรายอยู่ในระเบียงคตของเปิ่นนี่ดูงดงามละก่อขลังอย่างบอกบ่าถูก..... บรรยากาศก่อวังเวงดี..... ความเงียบละก่อความมืด ในบรรยากาศจะนั้น มันวัดใจ๋เฮาขนาด มันเยี๊ยะหื้อเฮาเห็นหัวใจ๋ของตั๋วเก่านักขึ้น....

ได้เห็น ความกั๋ว ความอ่อนแอ ความไร้สติ ไร้ปัญญาของตั๋วเก่า ละในทางเดียวกั๋น เฮาก่อจะหันความเข้มแข็ง ความกล้าหาญ ความสงบ ความนิ่ง ละก่อปัญญา ตี่ขึ้นมาต่อสู้กั๋นอย่างสนุกสนาน.....

เหมือนจะประกาศความยิ่งใหญ่ของธรรมะ ตี่ย่อมมีชัยเหนืออธรรม....

มันเป๋นหนทาง หนทางเตียวตี่สง่างาม และเข้มแข็ง ยิ่งใหญ่..... แข็งแกร่ง ดั่งเพชร ก่อป๋านนั้น...

จากวัดมหาธาตุเฮาก่อปากั๋นไป.... วัดใหญ่สุวรรณาราม.... วัดตี่เฮาจะหันศาลาไม้สักในแบบของอยุธยาแต้ๆ ตี่หลงเหลืออยู่....

ศิลปะ ละก่อความหลังตี่เป๋นบาดแผลระหว่างชนชาติ..... ยังเห็นได้จากบานประตู๋....