วันนี้ขึ้นต้นเป๋นเรื่องของกระทง... แต่อาจจะบ่ามีกระทงหื้อเห็น อันนี้ก่อจะไปว่ากั๋นเน่อ... ฮิ ฮิ... เพียงแค่อยากมาอู้มาจ๋าบ่าดาย.. เพราะหันว่างานกระทงบ้านเฮามันออกจะแปร่งๆ ออกจะก๋ายๆ ไปพ่องต๋ามก๋าละ ต๋ามเวลา.... จ๋นปอบ่าค่อยมีคนฮู้ว่าวันเป็งเดือนยี่เปิ่นเป๋นจะใด... (บ่าเดี่ยวก๋ายเป๋นวันเพ็ญเดือนสิบสองไปละจะนั้น)....

วันเป็งเดือนยี่ กาว่าเดือนสองของคนเมืองเฮาเป๋นวันสำคัญวันนึ่งหลังจากวันออกผะสา.... เป๋นวันตี่เปิ่นจะมีก๋านบุญ ก๋านกุศล เป๋นก๋านเทศธรรมมหาชาติ... โดยจะมีก๋านเทศกั๋นตั้งแต่เจ้ามืดจ๋นสุ๊ดเสี้ยงวันหื้อครบต๋ามทศชาติของพระพุทธเจ้า.... กั๋นเจ้ากั๋นแรกเปิ่นว่ามีบุญนัก เพราะเจ้าของกั๋นเทศต้องมาแต่เจ้าตี๋สี่ตี๋ห้า.... มาบ่าเดี่ยวกอยเอาเต๊อะว่าศรัทธาของคนบ้านเฮาเป๋นจะใด..???...

กอยวัดวาเหงาซ๊อกต๊อก... ซ้ำอากาศเย็นๆ คนสุ่นอยู่ก่าในผ้าต๊วบ บ่ามีศรัทธาจะลุกเจ้าไปวัด วัดวาก่ามีก้าโกมรอศรัทธามาวัด...

ซ้ำเตื่อสิ่งเหล่านี้มันอาจจะเป๋นสัญญาณเตือนอะหยังซ้ำอย่างหื้อเฮาได้ฮู้.... ฮู้ว่าจิตใจ๋คนบ่าเดี่ยวนี้จะหลิ่งลู่ไปตางใด...

ความเงียบเหงาของกั๋นเทศ มีก่ากั๋นเทศเก๊าตั้งอยู่อันเดียวเป๊กเหล็ก .... กอยแล้วเป๋นดีอายผะเจ้า... ซ้ำเตื่อก่ออายตั๋วเก่า ตี่บ่ามีจิตฮิหายังก๋านกุศล ขาดซึ่งศรัทธาประสาทะเสียสละความสุขเล็กน้อยมาจ่วยกั๋นต่อเติมสิ่งอันควรแก่ก๋านกระทำ...


โพสต์นี้ได้รับการแก้ไขโดย loongtri Nov 20 2008, 11:14

มากึ๊ดฮอดเอาว่าคนบ่าเดี่ยวนี้... ละเลยสิ่งตี่ควรจะเป๋นก๋านเสียสละ ละความเห็นแก่ต๋นตั๋ว จ่วยกั๋นทำนุบำรุงสิ่งต่างๆ ด้วยจิตใจ๋ และบ่าเห็นแก่ผลประโยชน์..

คนบ่าเดี่ยวจะแป๋งจะสร้างจะทำอะหยัง... ก่อเอาผลประโยชน์ เอาก๋านแข่งขันขึ้นเป๋นประเด็นหลัก เอาเป๋นเรื่องใหญ่ เอาเป๋นเรื่องแต้ว่าเหลือก๋านเห็นแก่ก๋านเสียสละ ก๋านอุ้มชู ก๋านทะนุบำรุง ด้วยจิตใจ๋ อย่างแต้จริง....

อย่างงานกระทงใหญ่กระทงหลวงนี่... เฮาอยากเรียกร้อง อยากวิงวอน ขอหื้อหมู่หน่วยงานราชก๋าน หน่วยงานก๋านศึกษาใหญ่หลวงตึงหลาย ละเว้น หยุดเหียซึ่งก๋านแข่งขัน... ก๋านเข้าฮ่วมฮับรางวัล เพราะเป๋นก๋านบ่าเหมาะสม... เพราะหน่วยงานเหล่านี้มีตึงงบประมาณ และผู้คนหลวงหลายตี่จะมาแต่งดา ยกหย้องหื้องานของต๋นตั๋วงดงามใหญ่โต ซึ่งบ่ายุติธรรมกับคนบ้าน จาวบ้าน เจ้าหมู่ตี่เปิ่นมีใจ๋มีศรัทธาเข้าฮ่วม....

เพราะรางวัลควรเป๋นเรื่องของก๋ำลังใจ๋ของศรัทธาจาวบ้านจาวจอง หื้อเปิ่นได้มีแฮงฮ่วมกั๋นแป๋งสร้างสิ่งดีงามต๋ามวัฒนธรรม... ส่วนหน่วยงานราชก๋าน สถานศึกษานั้นมีหน้าที่ มีภาระกิจ ตี่ต้องเป๋นผู้ชี้นำ เป๋นผู้สนับสนุน เป๋นผู้หื้อความฮู้ความถูกต้องในก๋านประเพณีต่างๆ บ่าใจ่เป๋นชนวนของก๋านทำหื้อประเพณีก๋ายไปจากความงดงามตี่เกยมี... ก๋ายไปเป๋นก๋านแข่งขัน ก๋ายไปเป๋นผลประโยชน์.... แล้วถึงจุดนึ่งก่อได้ก่ามาว่าจาวบ้านว่าทำลายประเพณีตี่ดีงาม.... เอ่อเน๊าะ ละไผเป๋นคนเริ่มก่อน...????... ความบ่าถูกต้องมันเริ่มจากไผ... ซ้ำเตื่อ กึ๊ดๆ แล้วมันน่าอาย.... ว่าอั้น...

หลายปี๋แล้วตี่เฮานี้บ่าอยากไปกอยกระทง... บ่าอยากไปกอยอะหยังตี่มันน่าละอาย... บ่าอยากไปเห็นหน่วยงานราชก๋าน หน่วยงานก๋านศึกษา เยี๊ยะอะหยังเอาก่าผลประโยชน์ บ่าอยากไปหันคนเอาขี้เยื้อ ขี้ขยะ ไปล่องลอยในลำน้ำ ในแม่น้ำ... บ่าอยากไปหันผู้คนทำร้ายกั๋นด้วยเสียงอึกทึก และเสียงดังของวัตถุระเบิด สิ่งหมู่นี้มันเป๋นฮอย เป๋นแผลเป๋น ตี่จารึกอยู่บนวัฒนธรรมของวันนี้... ซึ่งมันต่างจากฮอยเดิมตี่เฮาฮู้สึก...


โพสต์นี้ได้รับการแก้ไขโดย loongtri Nov 20 2008, 11:02

ต่างจากฮอยเก่าตี่ฮีตของเฮามีก่าความสงบเรียบร้อยและฮ่มเย็น... เป๋นฮีตตี่มีก่าศรัทธา ก๋านเสียสละ ความฮัก ความสามัคคี มีแต่ก๋านหื้อ บ่าหวังก๋านฮับ... เป๋นความสงบระงับและเยือกเย็นในจิตใจ๋...

เป๋นฮีตแห่งความสามัคคี ความศรัทธา ตี่บ่ามีกำว่าผลประโยชน์ และชัยชนะ... มีก่าใจ๋... และก๋านฮ่วมใจ๋ตี่มอบหื้อ...